السلام عليكم ورحمة الله
اهلاً ومساء الخيرات على اجمل اصحاب اوفياء للمدونة ☺❤
المرة هذي راح يكون الموضوع غير عن التدوينات السابقة،من اكثر المواضيع انطلبت مني وش نوع الكاميرا ونوع الاضاءة وش عدستك وبرامج التعديل الي تستخدميها؟قررت انو راح اكتب تجربتي وكل الاشياء الي استخدمتها بأختصار .
اكثرنا يهمة ويجذبه موضوع جمالية الصوره والخروج بصوره احترافية وجودتها عالية،
قبل كل شي ضروري تعرفين انتي وش تبين هل تفكرين في صناعه محتوى ممكن يكون مصدر دخل لك او فقط يوميات وسفرومثل هاذي الاشياء لولليوميات فاكاميرا الجوال توفي بالغرض خاصة الجولات الي نزلت الفترة الاخيرة والمزاياء الاحترافية الي راح تفيدك في التصوير والعزل وكمان المعالجة.
وبصراحة مااحب اتكلم في موضوع مو تخصصي لاني ماصور بالجوال كثير فماراح اطول في الشرح فيه ناس متخصصين واكثر كفائه مني.
:: اما الفئه الثانيه الي عندهم بزنس وايضآ المهتمين بصناعة المحتوى ممكن يكون مصدر لهم هنا انصح بالكام الاحترافية لانها تعطي طابع احترافي لصوره وتجذب الزوارويكون شكل بروفايل الانستقرام بروفشنال اكثر.
فيه انواع متعدده من الكاميرات باسعار مختلفة في متناول الجميع وشركات متعدده اشهراها ( كانون_ نيوكن_سوني ) بالنسبة لي اخترت كانون لان ادواتها متوفره مثل العدسات وسهلة في الاستخدام ..
وقت اختيار الكام او الحيرة أي نوع تختار ؟اختار حسب حاجتك ونوع التصويرلو مثلاً لتوثيق فية الكاميراالمدمجة الصغيرة ،
لو لتصوير الصحفي مثلاً تحتاج كاميرا بموصفات مُعينة وايضاًعدسة لهذا النوع من التصوير.
لوتبي الكاميرا لتصوير التجاري ولاحتراف ويكون مصدردخل بالتأكيد راح نختار نوع كاميرا احترافية وراح أوضح تحت نوع الكاميرات الغالية او متوسطة السعر،تذكر انو الكاميرا جزء من عدة أجزاء فية الفلاشات الاستاندات وغيرها كثيرمن عدة التصوير.
ارجع وأقول اسال نفسك قبل تبدا في الشراء هل فعلاً عندي المقدرة استمر في التصوير وأيضا الاستعداد انو اصرف مبالغ علية ؟تأكدو انكم تحبون التصويروحابين تكملون فية.
الكاميرات من شركة كانون او غيرها يوجد فيها فئتين من الكاميرات نوع يطلق علية كاميرات الكروب يعني الاطار يكون مقطوع او مقتطع غير كامل ،سعرها اقل بفارق عن كاميرات الفل فريم الي يكون فيها الاطار كامل ولان سعرها غالي الفل فريم يقتنيها اصحاب البزنس والمحترفين غالباً تتميزكاميرات الفل فريم عن نوع كاميرات الكروب بجودة الصورة اولألوان أيضا مهما رفعنا الضوء عن طريق الايزوماراح يكون فيها تحبب ،
اخذتها في البداية وتعلمت عليها (( مثلث التعريض)) وكيف اتحكم فيه وهاذا التحكم يعتبر يدوي يعتبر مهم للي راح يحترفون التصوير ممكن الاستغناء عنه في البداية واختيار التحكم الاوتوماتيك لوبس تبين صورة احترافية والتوازن مظبوط ومالك بمشاريع التصوير .إذا استخدمنا الوضع اليدوي المشار الي بعلامة (m) نتحكم احنى بمثلث التعريض يتكون من فتحة العدسة ،سرعة الشتر،الايزو
صور توضح لكم الكلام الي ذكرتة👇
مهم نفهم مثلث التعريض واللمارسة والتطبيق مثلاً نعدل هذي الاعدادات الي في فوق 👆اثناء التصوير مع وجود إضاءة مثل الشمس او مصدر إضاءة أخر حتى نحصل على إضاءة موزونة ونركز على مقياس كمية الإضاءة لوكان في النص باالظبط هذا يعني انو الإضاءة موزونة وصحيحة لو كان اقل او اكثر يعني انو كمية الإضاءة اما مرتفعة او منخفضة مهم نصورونعدل مع الممارسة صدقوني راح يكون اسهل شي في التصوير.
بعد ماصار عندنا خلفية عن الاعدادات نجي للخطوة المُهمة الي هو (العدسة) العدسات أنواع كثير وأسعار وفئات تختلف الصناعة والجودة .
العدسات بشكل عام نوعين :
النوع الأول يسمى البرايم (بعد بؤري ثابت):نتكلم اول شي عن مميزاتها تتميز بحدتها العالية في التصوير وعزل قوي عن المتحركة ،وزنها يكون اخف من العدسات المتحركة،السعر يكون اقل من المتحركة في اغلب الأحيان ،عدسات البرايم تكون اسرع في التقاط الضوء والسبب يرجع لكبر فتحتة العسة ،كبر فتحة العسة يكون 1او2 بوينت،من اشهر عدسات البرايم ذات الفتحة الواسعة (50m)الشهيرة مناسبة لتصوير البورترية وتصوير المنتجات وأيضا عدسة 85و100ماكرو الرائعة المخصصة لتصوير التفاصيل.
النوع الثاني العدسات الزوم المتحركة (بعد بؤري متغير):يعيبها الوزن الثقيل .بشكل عام الدقة في بعض الأنواع ليست عالية بسبب كثرة الشراح الزجاجية عكس عدسات البرايم,لاكن مايمنع انوهناك أنواع من عدسات الزوم دقتها وفتحة عدستها واسعة مثل عدسة الزوم الشهيرة من كانون(24.70)(70.200)مناسبة للاعراس والتصويرالرياضي التصوير المعماري مناسبة للمساحات الكبيرة .
انصح لو ميزانيتك تساعد تاخذون مع الكام عدسه اضافية غير عن العدسة الأساسية الي تجي مع الكاميرا غالبا يجي مع الكام عدسة زوم متحركة لو تبين عزل وتصوير منتجات انصح بعدسة الخمسين ملي الشهيره نتاجها جباره ومُرضية متوفرة بسعر 400 ريال وماندمت عليها اغلب صوري بالانستقرام مستخدتها باستثنأ اخر 10 صور كانت بعدسة١٠٠ ماكرو وتعتبر أغلى تقريباً ٣الاف لاكن مايلغي إعجابي لعدسة الخمسين اغلب الي ماحبوها مااشتغلو على نقاط القوة تبعها.
نجي لفقرة التصويراهم نصيحة قبل كل شي مارسو التصوير بشكل يومي بدون انقطاع راح تخبصون في البداية كثيير نفس الي يحصل مع اي مصورمُتمرس ماتطلع الصور مثالية في البداية نحتاج نغير ونعدل وممكن تكون القطة الاخيرة بعد عدة محاولات هي الافضل كونو صبورين وهذي اهم نصيحة فادتني في مشوار التصوير .
:
خذو دورات لو مااستفدو كثير ارجعو لليتيوب انا حرفياً اتوقع شاهدت
اكثر من الف مقطع خلال مشواري متخيلين ولسى بتابع مو بس تصوير يابنات وظبط الاضاء ومعالجة وكلها سهلة مو صعبة فقط تحتاج وقت وممارسة لو ١٠دقايق يومياً تكفي .
نرجع لنوع الكام الي اخذتها للمهتمين ولانو انطلب مني كان اختياري لأول كاميرا في بدايتي كانت لكانون 600 D "كاميراء جيدة واعطتني نتائج مُرضية بالمقارنه بسعرها الي كان 1600 ريال ،
لاكن لو بعطي نصية في الوقت الحالي لاني اخذتها قبل 5 سنوات انصحكم بكانون ( 70 D ) حلو تبدون فيها لان مواصفاتها تتفوق كثيرعلى كانون ( 600 ") من ناحيه الالوان والمساحه وجمال الصورة وبقية المميزات .
ماخفيكم كنت في البدايه اطلع بصور شاطحة مره تكون ظلام ومره تكون اضائتها عاليه جداًصحيح كنت اتحلطم كثيرويختفي الحماس بس كنت مُصره اني اتعلم واكمل في التصويرحتى وصلت للاحترافية وصرت افهم في الاعددات وفي الزواياء واتجاة الاضاءه وكل هاذا يجي مع الممارسة ومتابعة المصورين الاكثر خبرة واستشارتهم والحين وصلت لمرحله راضيه عن نفسي ومازلت حريصه اتعلم اكثر.
نجي لثاني عنصراساسي في الصوره الي هياالاضاءة.
مصادرالاضاءة متنوعة ومختلفة اشهرها الأضاءة الطبيعية الربانية (الشمس )تعطي اضاءة ناعمة لو حرصنا انها ماتكون بشكل مباشرنختار الشروق او الغروب راح تكون مريحه للعين مع التحكم بمكان الكام والعنصرالي راح نصورة وغالباً تكون الاضاءة خلف المنتج او العنصر.
المصدرالثاني , الاضائة الصناعية ولها انواع مختلفة ممكن تستاخدمون اضائة المتوفرة في البيت لاكن تكون اضائتها عاليه وممكن تستخدمون فلاشات الخاصه بالتصوير اسعارها تبدا من 300 ريال فما فوق المميز في الفلاشات تتوصل مباشره مع الكام وتعطينا تجميد للصوره وحقيقي حسنت من تصويري كثيير.
نجي لأخر شي قبل تنزيل الصوره في الحساب الي هيا المعالجه وبرامج التعديل مثل ( الايت روم _ والسناب سيد ) باالمختصر الثنين من وجهه نظري وتجربتي لها مقاربه كثير للفوتوشوب وتعطيكم خيارات في التعديل توازن اللون الابيض وحدة الصورة واصلاح بعض العيوب الي تظهر في الصورة بشكل احترافي شوفو مقاطع لمصورين يشرحون هذي البرامج افضل تأخذون فكرة عنها.
أخر شي تنحفظ الصورة بكامل التعديلات اهم شي وبكذا تكون الصورة جاهزة تنزلونها في الانستقرام ،انتظروني في الجزء الثاني من الموضوع لو عندكم أسئلة ياليت تكتبون تحت عشان اكتب اجاوب عليها 😍✌
اتمنى اكون وصلت لكم لو جزء بسيط ممكن يساعدكم ويسهل عليكم أختيارعدة التصوير .
كل التوفيق يارب للجميع وصلت نهاية التدوينة دُمتم بصحة وامان .
0 التعليقات:
Post a Comment